Հարկային օրենսգիրք, հոդված 380.1 — էլեկտրոնային (վիրտուալ) ՀԴՄ
Հայաստանի Հարկային օրենսգրքի 380.1 հոդվածի՝ էլեկտրոնային (վիրտուալ) ՀԴՄ-ները կարգավորող, հայերեն բնագիրը և fiscal.am-ի թարգմանությունները — երբ է թույլատրված, երբ՝ պարտադիր, և ինչպես է ձևավորվում էլեկտրոնային կտրոնը։
Վերջին ստուգում՝ 28 ապրիլի, 2026 թ.
Ինչպես է fiscal.am-ն օգտագործում այս հոդվածը
380.1 հոդվածը վիրտուալ ՀԴՄ-ի իրավական հիմքն է։ Ուշադրություն դարձրեք անհամաչափությանը. 1-ին մասը թույլատրական է (էլեկտրոնային ՀԴՄ կարող է կիրառվել կայքով / էլեկտրոնային հարթակով ընդունված պատվերների համար), իսկ 1.1-ը՝ պարտադիր երկու առանձին դեպքերում. (ա) էլեկտրոնային հարթակով ուղևորափոխադրման ծառայություն մատուցող կազմակերպությունների ու ԱՁ-ների, և (բ) կազմակերպությունների, ԱՁ-ների կամ ֆիզիկական անձանց կողմից մարդատար տաքսի ավտոմոբիլներով ուղևորափոխադրումների իրականացման դեպքում։ Հոդվածը ավելացվել է 2020 թվականի հունիսի 1-ի ՀՕ-280-Ն օրենքով և էապես ընդլայնվել է 2023 թվականի դեկտեմբերի 8-ի ՀՕ-395-Ն օրենքով, որը նաև ոչ-ԱՁ ինքնավար տաքսի վարորդներին ընդգրկել է էլ. ՀԴՄ-ի պարտականության տակ։ 1.1-ից դուրս ամեն ինչի համար ՀԴՄ-ի կիրառման պարտականությունը մնում է 380 հոդվածով։ Տե՛ս նաև՝ Սարքայի՞նը, թե՞ վիրտուալը։
§1 Հայերեն · canonical
Կազմակերպությունների և անհատ ձեռնարկատերերի կողմից ինտերնետային կայքի կամ էլեկտրոնային հավելվածի (էլեկտրոնային առևտրային հարթակի) միջոցով ընդունվող պատվերների շրջանակներում ապրանքների մատակարարման, ծառայությունների մատուցման կամ աշխատանքների կատարման գործարքների մասով կարող է կիրառվել էլեկտրոնային հսկիչ դրամարկղային մեքենա։
§1.1 Հայերեն · canonical
Էլեկտրոնային հարթակով ուղևորափոխադրման ծառայություն մատուցող կազմակերպությունների կամ անհատ ձեռնարկատերերի կողմից պատվերների ձևակերպման և ուղևորափոխադրումների, ինչպես նաև կազմակերպությունների, անհատ ձեռնարկատերերի կամ ֆիզիկական անձանց կողմից մարդատար տաքսի ավտոմոբիլներով ուղևորափոխադրումների իրականացման դեպքում էլեկտրոնային հսկիչ դրամարկղային մեքենայի կիրառությունը պարտադիր է:
§2 Հայերեն · canonical
Էլեկտրոնային հսկիչ դրամարկղային մեքենան ծրագրային ապահովում է, որը հնարավորություն է ընձեռում սույն հոդվածի 1-ին մասում նշված՝ հարկ վճարողների կողմից ապրանքների մատակարարման, ծառայությունների մատուցման կամ աշխատանքների կատարման գործարքների, իսկ 1.1-ին մասում նշված՝ հարկ վճարողների կողմից ուղևորափոխադրումների իրականացման գործարքների համար գեներացնելու էլեկտրոնային հսկիչ դրամարկղային մեքենայի էլեկտրոնային կտրոն:
§3 Հայերեն · canonical
Էլեկտրոնային կտրոնը ձևավորվում է հարկային մարմնի էլեկտրոնային կառավարման համակարգին սույն հոդվածի 4-րդ մասում նշված ձևաչափով սահմանվող տեղեկատվությունը էլեկտրոնային եղանակով փոխանցելու և հարկային մարմնի էլեկտրոնային կառավարման համակարգից էլեկտրոնային եղանակով ֆիսկալային համար ստանալու ու էլեկտրոնային հսկիչ դրամարկղային մեքենայի էլեկտրոնային կտրոնի վրա պարտադիր տպագրման ենթակա տեղեկատվությունն արտացոլելու միջոցով։
§4 Հայերեն · canonical
Էլեկտրոնային հսկիչ դրամարկղային մեքենաների տեխնիկական պահանջները, դրանց հաշվառման, հաշվառումից հանման, դրանց միջոցով տրամադրվող էլեկտրոնային կտրոնի պարտադիր վավերապայմաններին ներկայացվող, ինչպես նաև ինտերնետային կայքի կամ էլեկտրոնային հավելվածին (էլեկտրոնային առևտրային հարթակին) ներկայացվող պահանջները, էլեկտրոնային հարթակով ուղևորափոխադրումների, կազմակերպությունների, անհատ ձեռնարկատերերի կամ ֆիզիկական անձանց կողմից մարդատար տաքսի ավտոմոբիլներով ուղևորափոխադրումների իրականացման դեպքում կիրառության կանոնները սահմանում է Կառավարությունը։ Էլեկտրոնային հսկիչ դրամարկղային մեքենայի և հարկային մարմնի էլեկտրոնային կառավարման համակարգի միջև տեղեկատվության փոխանակումն իրականացվում է հարկային մարմնի հաստատած հատուկ ձևաչափով (վեբ ծառայության նկարագիր):
§5 Հայերեն · canonical
Էլեկտրոնային հսկիչ դրամարկղային մեքենաների կիրառման կանոնները չպահպանելն առաջացնում է Օրենսգրքով սահմանված պատասխանատվություն։